“Yahoo!”-гийн үүсгэн байгуулагчдын нэг болох Жерри Янг ерөнхий захирлаасаа огцрох болжээ. Тус компанийн хувьцаа сүүлийн үед огцом унаснаас менежмент нь багагүй шүүмжлэлд өртсөн аж.

Янг өнгөрсөн жилийн долдугаар сараас “Yahoo!”-гийн ерөнхий захирлын албыг хашсан бөгөөд “Microsoft”-д өөрийн компаниа зарахгүйн тулд бүхнийг хийж байжээ. “Microsoft” компани “Yahoo!”-гийн нэгж хувьцааг 33 ам.доллараар худалдаж авах санал тавьсныг хэт бага хэмээн үзэж байсан билээ.

Жерри Янг ерөнхий захирлын албанаасаа огцорч буй боловч компанидаа үлдэж, шинэ технологи боловсруулах, нэвтрүүлэх тал дээр анхааран ажиллана хэмээн эх сурвалжууд мэдээлсэн байна. Үүний зэрэгцээ тэрбээр өөрийн залгамжлагчаа сонгох ажилд оролцохоо албан ёсоор мэдэгджээ.
Өнгөрсөн даваа гаригт “Yahoo!”-гийн нэгж хувьцаа 10.63 ам.доллар болтлоо хямдарсан байна

Эх сурвалж: GoGo.mn